
第一世噶玛巴教言集1KM25སྒྲོལ་མའི་རྗེས་གནང་བཞུགས་སོ། །
1-2-176b
༄༅། །སྒྲོལ་མའི་རྗེས་གནང་བཞུགས་སོ། །
༄༅། །སྒྲོལ་མའི་རྗེས་གནང་བཞུགས་སོ། །རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །རྗེ་བཙུན་མ་སྒྲོལ་མའི་རྗེས་སུ་གནང་བའི་ཆོ་ག་བྱེད་པར་འདོད་པས། གནས་དབེན་པར་མཎྜལ་དྲི་བཟང་གིས་བྱུགས་ལ། མེ་ཏོག་ཚོམ་བུ་ལྔ་བཀོད། མཐར་མཆོད་པ་དང་གཏོར་མ་གསུམ་གྱིས་བསྐོར། རྗེ་བཙུན་མའི་སྐུ་རབ་གནས་ཅན་དང་། རྟེན་གཞན་ཡང་ཅི་རིགས་པར་བཀྲམ། དེ་ནས་རང་གཞན་རྣམས་ཁྲུས་བྱ། སེམས་བསྐྱེད་སྔོན་དུ་སོང་བ་དང་། བདག་ཉིད་མངོན་རྟོགས་བསྒོམ། སྙིང་པོ་ཅི་རིགས་བགྲང་། དེ་ནས་མདུན་གྱི་མཎྜལ་མི་དམིགས་པ་ལས་པད་ཟླའི་གདན་ལ་ལྷ་མོ་སྒྲོལ་མ་ལྷ་ལྔར་བསྐྱེད། སེང་ལྡེང་གི་ནགས་དང་། པོ་
1-2-177a
༄༅། །ཏ་ལ་ནས་ཡེ་ཤེས་པ་སྤྱན་དྲངས་ལ་བསྟིམ། སྐུ་གསུང་ཐུགས་བྱིན་གྱིས་བརླབས། དབང་བསྐུར་ལ། དོན་ཡོད་གྲུབ་པས་དབུ་རྒྱན་པར་བསམ་མོ། །དེ་ནས་མཆོད་པ་འབུལ། བསྟོད་པ་བྱ། ཡན་ལག་བདུན་པ་བྱ། སྔགས་བརྒྱ་རྩ་བརྒྱད་བཟླས། སྐུ་གསུང་ཐུགས་མཉེས་པའི་མཆོད་པ་འབུལ་བར་བསམ་མོ། །དེ་ནས་བཅོམ་ལྡན་འདས་སྒྲོལ་མའི་ལྷ་ཚོགས་བསམ་གྱིས་མི་ཁྱབ་པ་མདུན་དུ་བསམས་ལ། དེ་རྣམས་ཀྱི་ཞབས་ལ་གཏུགས་ཤིང་ཕྱག་འཚལ་བར་བསམ་ལ། བསྟོད་པ་ཚར་གསུམ་འདོན་ལ། དེ་ནས་སློབ་མ་རྣམས་སྙིམ་པ་མེ་ཏོག་དང་བཅས་པས་འདུག་ལ། སློབ་དཔོན་གྱི་རྗེས་བཟློས་བྱ་བ་ནི། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བཅོམ་ལྡན་འདས་མ་སྒྲོལ་མ་བདག་ལ་དགོངས་སུ་གསོལ། སློབ་དཔོན་གྱིས་བདག་ལ་ཐུགས་བརྩེ་བས་བཅོམ་ལྡན་མའི་རྗེས་གནང་མཛད་དུ་གསོལ། ཅེས་ལན་གསུམ་བརྗོད་དོ། །དེ་ནས་བླ་མ་དང་སྒྲོལ་མ་གཉིས་ཀྱི་ཐུགས་ཀ་ནས། ཨོཾ་ཏཱ་རེ་ཏུཏྟ་རེ་ཏུ་རེ་སྭཱ་ཧཱ། ཞེས་པའི་སྔགས་ཐོན་ནས། སློབ་མའི་ཐུགས་ཀར་ཐིམ་པར་བསམ་ཞིང་རྗེས་བཟློས་ལན་གསུམ་བྱའོ། །དེ་ནས་སློབ་མས། བཅོམ་ལྡན་བདག་གིས་བཟུང་ལགས་ཀྱིས། །བཅོམ་ལྡན་བདག་ལ་བྱིན་གྱིས་རློབས། །ཞེས་བརྗོད་ལ། དེ་ནས་སློབ་
1-2-177b
དཔོན་གྱིས་མཎྜལ་གྱི་ནས་སློབ་མའི་སྤྱི་བོར་བཞག་ལ། ངག་ཏུ། རྗེ་བཙུན་སྒྲོལ་མའི་བྱིན་གྱི་རླབས་དང་། །ཐུགས་རྗེའི་ལྕགས་ཀྱུས་བཟུང་ནས་ཀྱང་། །བདེ་ཆེན་གནས་སུ་དྲང་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །ཞེས་བརྗོད་པས། བླ་མ་དང་སྒྲོལ་མ་སྤྱི་བོ་ནས་མར་ཐིམ་པས་བྱིན་རླབས་རྒྱུད་ལ་ཞུགས་པར་བསམ་མོ། །དེ་ནས་གཏོར་མ་བཏང་བ་ནི། དང་པོ་བླ་མ་དང་སྒྲོལ་མ་གཉིས་ལ་བསྔོ། གཉིས་པ་ཆོས་སྐྱོང་ལ། གསུམ་པ་གཞི་བདག་ལ། བཞི་པ་གནོད་བྱེད་ལ། ལྔ་པ་རིགས་དྲུག་ལ་བསྔོའོ། །དེ་ནས་ཡེ་ཤེས་པ་གཤེགས་སུ་གསོལ། མཎྜལ་གྱི་དམ་ཚིག་པ་བསྡུ། དགེ་བའི་རྩ་བ་བསྔོ། སློབ་དཔོན་ལ་ཡོན་འབུལ། དགེ་སློང་བཞི་སྡེ་ལ་སོགས་ལ་ཚོགས་བསགས །དབུལ་འཕོངས་ལ་སྦྱིན་པ་བཏང་། ལས་ཀྱི་རྗེས་མི་མངོན་པར་བྱའོ། །སྒྲོལ་མའི་རྗེས་གནང་གི་ཆོ་ག་རྫོགས་སོ།། །།


目录
སྒྲོལ་མའི་རྗེས་གནང་བཞུགས་སོ། །